Jus lea miella lohkat ealli sámi birrasis, gos maiddái oahpasnuvat eará sámi guovllu olbmuiguin, boađe máilmmi áidná sámegielat alit oahppoásahussii - Sámi allaskuvlii!

Dáppe leat oahppofálaldagat mat leat dunnje heivehuvvon ja dáppe lea movttidahtti ja hástaleaddji oahppobiras gos duođai beasat iežat dáiddu ja gelbbolašvuođa ovddidit.

Sámi allaskuvllas don beasat

• oahppat sámegillii ealli sámi birrasis
• oažžut sámi ja álgoálbmot perpektiivva buot oahpahusas
• vásihit buori oahpahusa ja lagasvuođa earáide, sihke miel-studeanttaide ja oahpaheddjiide
• oahpasmuvvat iešguđetguovllu sámi servodagaide ja sámiide
• fuomášit árbevierromáhtu ođđa ja ođđaáigásaš oktavuođain 
• beasat luoikat ođđaáigásaš rusttegiid nugo giehtadihtoriid ja digitála kameraid
• oahpasnuvvat eará álgoálbmogiiguin 
• vuolgit lonohallanstudeantan olgoriikii   

Leago dás juoga mii geasuha du?

"Boađe don ge hábmet iežat boahtteáiggi!"

Álggogeahčen oahppojagi Sámi allaskuvla lágida álggahanvahkku ođđa ja ovddeš studeanttaide. Álggahanvahkku prográmmas leat almmolaš rahpanbeaivi, diehtojuohkin Sámi allaskuvlla birra, fáddarortnet ođđa studeanttaide. Lágiduvvojit maid sosiála dáhpáhusat dego omd. dolastallan, kano-tuvra ja studeantaeahket. Leat maid kurssat studeanttaide, omd. girjerájus ja Classfronter kurssat.  

Guovdageaidnu studeanttabáikin

Guovdageaidnu mearkkaša "guovdu geainnu" ja lea doloža rájes leamaš guovdu Sámi.
Mii hálidit ahte Guovdageaidnu ja Sámi allaskuvla dál maid galgá leat sámi nuoraid ja earáid deaivvadanbáiki, ja čohkket ollu sámi studeanttaid miehtá Sámis.

Guovdageainnus lea ealli sámi biras gos sámegiella gullo beaivválaččat. Guovdageainnus leat valljugas ja girjás kultureallin ja dáppe kultuvrrat deaivvadit beaivválaččat.

Beassážit áiggi dáppe lágiduvvo Sámi beassášfestivála. Dalle čoahkkanit ollu olbmot miehtá Sámi messostallat, dolos árbevieru mielde. Beassášfestivála oktavuođas lágiduvvo Sámi filbmafestivála, Sámi Grand Prix, konsearttat, máilmmimeašttirgilvvut heargegilvovuodjimis, oaggungilvvut, skuhtercrossa vuodjin, teáhterčájálmasat ja olu eambbo. Beassážiid áiggi leat maid konfirmášuvnnat, ja árbevirolaččat máŋggas heajastallet, ja risttašit mánáid.

Čakčat borgemánus lágiduvvo "Kauto Live" festivála mii lea musihkkafestivála. Skábmamánus lágiduvvo Nilut Cup, mat lea spábbačiekčangilvu mii čohkke ollu olbmuid. Nilut Cup oktavuođas lávejit maid leat konsearttat.

Guovdageainnus ja Diehtosiiddas leat maiddai eará guovddáš sámi ásahusat, nu go Sámedikki oahpahus-, giella ja kulturossodat, Sámi árkiiva, Gáldu- Álgoálbmotvuoigatvuođaid gelbbolašvuođaguovddáš ja Riikkaidgaskasaš boazodoalloguovddáš. Guovdageainnus lea maid Beaivváš sámi teáhter, Ávvir ja Ságat aviissaid guovllukantuvrrat, Sámi Radio guovllukantuvra ja Sámi joatkka- ja boazodoalloskuvla.

 Dáin ruovttusiidduin gávnnat eanet dieđuid Guovdageainnu birra:

Guovdageainnu suohkana ruovttusiidu dás 
                             
Muđui lea Kautokeino Net buorre diehtogáldu

GLR Lágásradio dáppe gávnnat beaivválaš ođđasiid

Valáštallan ja ástoáiggebuđaldusat

Guovdageainnus leat stuora vejolašvuođat meahcásteapmái, ja luonddu vánddardeamis, go olles Finnmárkku duottar lea juste viessouvssa olggobealde. Guovdageainnus lea hui doaibmilis valáštallanbiras, ee. lea fierbmespábbun, spábbačiekčan, giehtaspábbun, čuoigan ja aerobic. Sámi allaskuvllas leat sierra hárjehallanáiggit Báktehárjji valáštallanhállas, gos hárjehallat sisbandy ja gievrrudanhárjehallama. Diehtosiiddas lea lášmmohallanlatnja gosa buot studeanttat ja bargit besset. Doppe leat iešguđetlágan lášmmohallanrusttegat ja gievrudanrusttegat.

Báikkálaš olgobáikkiin lea studeanttain vejolašvuohta lágidit studeantakroa, gosa buohkat badjel 18 besset. Guovdageainnus lea lávlunjoavku, gáffebára, teáhter, kino, heastastáljat ja máŋga iešguđetlágan searvvi- dego dánsunsearvi, musihkkariid searvi, risttalaš searvvit ja bridge-klubba.

Dáppe leat buorit duddjonvejolašvuođat jus hálidat duddjot. Lágiduvvojit duodjekurssat, ja lea maid vejolaš ieš duddjot Duodjeinstituhtas.

Ásodagat

Sis-Finnmárkku studeanttaid ovttastusas (SSO) leat 18 bearašásodaga ja 18 lanja (hybela). Sis-Finnmárkku studeanttaidovttastus vástida guoskevaš gažaldagaide. 

Mánáidgárdi

Studeantaovttastusas lea studeanttaide buorre mánáidgárdefálaldat. Studeanttaide lea vuoruhuvvon mánáidgárdesadji olles studerenáigodahkii. Mánáidgárddis leat guokte ossodaga mánáide gaskkal 1/2 jagis- 5 jahkái. Sámi doaimmat leat mielde mánáidgárddi árgabeaivvis. SSO vástida gažaldagaide mánáidgárdesaji ohcama, sajádaga ja mávssu birra. 
 
 
Muđui allaskuvlla fálaldagat studeantaide leat:
Studeantasearvi
Class Fronter
Studeantaaviisa
Dihtorlanjat ja mátkedihtorat
Giellakurssat
Girjerájus
Kantiidna
E-boasta čujuhus ja čoavddagoarta
Vuolgit olgoriikkii studeantan
Ođđa studeanttaide fáttarortnet-veahkki ja doarjja go lea amas ja ođas báikái!